Bario di Kustbatterij konosé un Sentro di Bario nobo.
30 di yüli 2021 Gobièrnu di Kòrsou i SEFBA huntu ku Fundashon Kas Popular a inougurá Sentro di Bario Kustbatterij. Ta trata di un proyekto ku Gobièrnu di Kòrsou a inisiá na 2018 komo parti di e proyekto “Plan di Urgensia Sentronan di Bario”, pa mehorá di e fasilidatnan di Sentronan di Bario ku tin establesé na Kòrsou. E Sentro di Bario situá na Kustbatterij ta unu ku pa hopi tempu tabata será pa falta di mantenshon. Ku e renobashon aki, SEFBA ta dispone di un Sentro di Bario funshonal ku lo sirbi e bario di Kustbatterij i bisindario ku varios funshonalidat unda habitantenan i organisashonnan di bario por hasi uzo di dje.
Minister Ruthmilda Larmonie-Cecilia di SOAW huntu ku Arthur Con, Direktor di Fundashon Kas Popular tabata na enkargo pa hasi entrega di yabi na Direktora di SEFBA sra. Elizabeth, kua ta e organisashon ku lo operá i manehá e Sentro di Bario (SdB).
E sentro di bario ta disponé di espasionan pa organisá aktividatnan paden i pafó. Esaki ta disponé di un sala di bario, kancha di mini futbòl i ‘bolas criollas’.
E renobashon ta e promé di dos fase planiá na e SdB Kustbatterij. Den e prome fase a hasi renobashon di e edifision prinsipal i athunto a renobá i traha un bar i kushina pa por sirbi bishitantenan na momentu di ku tin aktividatnan na e sentro. Den e di dos fase lo hasi renobashon di e kancha di mini futbòl, ya hobenan i adulto den e bario por hasi uzo optimal di esaki komo un forma di rekreo, moveshon i dibertishon.
Sentro di Bario Kustbatterij lo ta aksesibel di djaluna pa djabièrnè i riba petishon pa aktividatnan sosial, edukashonal, kultural òf deportiva durante di wikènt.