Bario di Brievengat tin awor un sentro multi-funshonal.
6 di novèmber 2022 SEFBA a hasi apertura ofishal di sentro multi-funshonal Brievengat (anteriormente Sentro di Bario Brievengat). Riba e dia aki a organisá un dia habrí i un bazar unda habitantenan di e bario di Brievengat i bisindario por a bini i mira tur loke Sentro multi-funshonal Brievengat den su bachi nobo tin di ofresé. E sentro aki ta brinda diferente fasilidat e.o. un sala di bario, un sala di kompiuter, ofisinanan flèksibel, kancha di deporte i un plenchi di aktividat unda habitantenan i organisashon di di bario por hasi apelahson di uzo durante oranan di operashon.
Durante e atardi a desvelá bòrchi di nòmber Sentro multi funshonal Brievengat. Durante e ceremonia direktor di sektor SOAW señor Victor Monk, direktora di sektor OWCS señora Lissete Sambo-Velder i direktora di SEFBA señora Arminda Elizabeth a tira diskurso pa empleadonan di SEFBA, invitadonan i bishitantenan di e aktividat. Despues di algun palabra spiritual dor di pastoor Jose Luis Dominguez, a hasi desvelo di e bòrchi di nòmber Sentro Multi-Funshonal Brievengat.
E renobashon di e edifision ta forma parti di e proyekto ku Gobièrnu di Kòrsou a inisiá na mart 2018 den kuadro di e plan di urgensia pa drecha barionan na Kòrsou. Ku e renobashon aki, SEFBA ta dispone di un Sentro di Bario multi-funshonal ku lo sirbi e bario di Brievengat i bisindario ku varios funshonalidat i servisio na habitantenan i organisashonnan di bario.
Sentro multi-funshonal Brievengat lo ta aksesibel di djaluna pa djabièrnè i riba petishon pa aktividatnan sosial, kultura, edukashonal òf deportiva durante di wikènt.