​Un kolaborashon mas estrecho entre e diferente instansiananan gubernamental i semi-gubernamental ku SEFBA, ta un di e metanan pa futuro. Pa medio di esaki por krea un mihó interkambio entre e nesesidat di komunidat i bario ku e instansianan konserní. E interkambio aki mester fortalesé e relashon entre pueblo i Gobièrnu den su totalidat i fasilitá desaroyo riba áreanan sosial, edukativo, formativo pero tambe seguridat, salu, bienestar i infrastruktural.

​Tin varios organisashon establesé na Kòrsou i otronan den Reino ku tin komo meta pa duna sosten na desaroyo di nos hendenan lokal. Pa e motibu aki SEFBA ta traha riba akuerdonan di koperashon entre e varios organisashonnan ku ta duna servisio na komunidat pa medio di programanan ku nan ta organisá. E akuerdo di koperashon ta uniformá e koperashon entre e organisashon i SEFBA pa krea un struktura duradero pa sirbi komunidat den e sentido mas amplio di palabra posibel.

​SEFBA ta enkargá pa organisá i guia programanan riba 8 diferente nivel pa komunidat. E programanan aki ta ser kategorisá bou di:

1. Edukashon

2. Formashon

3. Kultura

4. Informashon

5. Kreativo

6. Rekreativo

7. Sosial

8. Deportivo

Pa por realisá eksitósamente, SEFBA lo traha ku demas organisashon lokal i internashonal pa ehekutá programanan i proyektonan relashoná ku e tema aki riba un base anual. Programanan ya kaba desaroyá i ku lo ser ehekutá dor di identidatnan tersero, lo ser formalisá i guiá dor di e tim di SEFBA. E meta di esaki ta pa mantené uniformidat i garantisá ku e programanan aki ta yega un gran mayoria di e komunidat.

E pandemia ku a impaktá mundu durante e último aña tabatin su impakto tambe na Kòrsou. Prinsipalmente riba área ekonómiko varios famia a ser impaktá negativamente dor di e falta di labor disponibel lokalmente. Pa medio di e Plataforma ku SEFBA tin establesé, lo bini ku varios inisiativa pa yuda habitantenan den nesesidat pa yega na un labor nobo.

Esaki por ta pa medio di ‘training’ òf pa medio di ‘workshop’ ku habitantenan por kuminsá nan propio negoshi. Via di e plataforma di SEFBA lo tene un registró di e nesesidat di informashon, formashon i ‘training’ den barionan di Kòrsou pa por kumpli ku e meta aki.

Sigun mundu ta avansá, solushon nan nobo ta ser presentá ku ta duna un rehalse na kualidat di bida den barionan i di habitantenana di Kòrsou. Implementashon di solushonnan ku ta realisabel den barionan di Kòrsou por ser implementá pa medio di e organisashon nan di bario. E hèrmènt pa fasilitá esaki ta uzo di e sentronan di bario komo sentro di informashon i kordinashon di e diferente proseso i programanan aktivo den bario.

​Algun di e proseso nan aki ta enserá:

– Digitalisashon i aksesibilidat na e mundu digital pa e habitantenan

– Aksesibilidat na konosementu pa medio di un ‘database’ ku material edukativo i di aktualidat.

​Alabes por krea mihó kondishonnan di bida den bario pa medio di aktividat relashoná na naturalesa i higiena den bario:

– Plantashon i mantenshon di matanan den bario, pa krea i mantené barionan bèrdè i vibrante.

– Plantashon i repartishon di nos propio kuminda.

– Alimentashon na preisnan pagabel

– Redukshon di gastunan di energia i konsumo di awa dor di aplikashon di sistema modèrno.

​Konektividat ta hunga un ròl importante den esaki. No únikamente konektividat digital, pero SEFBA ta stimulá tambe konektividat entre organisashon pa habitantenan i habitante pa habitante. Trahando huntu nos por krea mihó kondishon di bida den bario i traha riba solushonnan duradero ku ta hiba kada persona den komunidat na un mihó kalidat di bida.

Pa por hasi esaki mas efisientemente posibel, SEFBA a transformá su organisashon pa esaki bira un muchu mas efisiente, interaktivo i inklusivo. Pa medio di e esaki nos ke brinda tur nos rekurso i fasilidatnan disponibel pa duna realse na e komunidat di Kòrsou.